Editoriau/ NAUA ETAPA

Der exemple d'experiéncies recentes ar entorn d'ua naua forma de pensar era politica e era societat en Aran, coma er Hilat peth Cambi o Aran XXI, nèish HILAT PER ARAN, era plataforma cibernetica que sage d'amassar coma punt de trobada es naues idèes e eth trabalh e era illusion qu'an refortit er univèrs progressista per miei d'ua concepcion d'Aran mès dubèrta e cosmopolita, atau coma mès justa sociaument e auançada des deth punt d'enguarda civic e democratic.

Ara qu'es opcions de progrès an devengut egemoniques en tot préner responsabilitats plan nautes ena governabilitat deth país e constituïr-se ena prumèra fòrça politica nacionau e ena màger part des principaus municipis d'Aran, ara ei eth temps de configurar un nau pensament qu'incidisque ena accion des actors publics des institucions politiques e er ensem dera societat civiu per mor d'ua perspectiva progressista, aranesista e impulsora d'ua democràcia cooperadora, mès orizontau, mens jerarquizada. En definitiva, que torne as arraïtz dera politica e d'un espaci public articulat en hilat.

Es pòrtes de HILAT PER ARAN demoren dubèrtes. Eth corrèu de participacion ei hilataran@gmail.com, entà recéber es aportacions que responen ath prètzhèt descrit, damb era possibilitat, atau madeish, d'èster publicades.