Incompliment deth pacte CDA-PP en Vielha e Mijaran
Eth grop d’Unitat d’Aran en Ajuntament de Vielha e Mijaran a denonciat, per miei deth sòn pòrtaveu, Joan Riu, er incompliment deth pacte de govèrn municipau, format per Convergéncia e eth PP, “en prolongar eth mandat der unic còsso deth PP mès d’un an e miei, en contra deth tèrme mercat per andús partits”. Eth tèrme vencie en deseme de 2008, moment en qué se produsirie eth relèu ena presidéncia dera alcaldia. “Er incompliment d’aguest pacte demòstre que Convergéncia non ei un partit de fiar e que, per contra, a fiat era sua sòrt ara inestabilitat d’un govèrn sense lideratge ne projècte de municipi”, a declarat.
Entà Joan Riu, “eth problèma non ei qu’eth còsso deth PP sigue encara alcalde, senon qu’er incompliment deth pacte repercotís ena governabilitat de Vielha e Mijaran, que demore ara sòrt dera imprevision e era inactivitat”.
Dempús d’un an e miei de govèrn de Convergéncia e PP, “es resultats de govèrn son fòrça praubi e era manca de planificacion, fòrça elevada”. Totun, Riu a denonciat “era pujada mieja der IBI de mès deth 15%, coma pòden comprovar es ciutadans enes rebuts; era congelacion deth finançament entàs nuclèus poblacionaus, qu’an de besonh de naues inversions e mès atencion; e er hèt que Vielha seguisque sense es projèctes prometudi”. Ath delà, a avertit sus era ineficàcia der equip de govèrn “en desviar era responsabilitat de govèrn der Ajuntament a ues autes institucions e organismes”.
Melhorar es servicis publics damb eth Hons Estatau d’Inversion Locau
Eth pòrtaveu municipau d’UA s’a preguntat en qué invertirà er Ajuntament es sòs deth Hons Estatau d’Inversion Locau, qu’a amiat entà dauant eth Govèrn der Estat “entà estimular era economia e eth trabalh des nòsti pòbles”. Vielha e Mijaran pòt disposar de lèu un milion d’èuros entà naues inversions, e eth termini de sollicituds de finançament des memòries explicatives susceptibles d’èster costejades peth Hons finalize era pròplèu setmana. Mès er Ajuntament non a hèt publiques es sues demanes. Per aguest motiu, UA vò saber “qué pense hèr er Ajuntament damb aguesti sòs”.
Joan Riu a proposat qu’er Ajuntament priorize “era melhora e reforma der hilat de carrèrs, infraestructures e servicis publics essenciaus coma era aigua, e tanben des accèssi des nòsti pòbles”. Entà UA, er esfòrç des petiti projèctes s’aurie de redistribusir “segontes es besonhs de Vielha e de cada nuclèu, damb er objectiu de que se pogue melhorar era imatge des pòbles e eth foncionament des servicis basics”. “Se tracte, en definitiva, de melhorar era qualitat de vida des nòsti vesins e vesies”, a soslinhat.
Reforma deth Passeg, viuendes sociaus e mès progrès
Damb aguesta volentat, eth pòrtaveu a exigit “era execucion immediata dera reforma integrau deth passeg dera Libertat”, qu’Unitat d’Aran a agut coma prioritat, d’ençà que governaue, damb era elaboracion d’un projècte finançat peth PUOSC, era Direccion Generau d’Arquitectura e Paisatge dera Generalitat e er 1% culturau deth Ministèri de Foment. Entà hèc possible, a demanat “mès diligéncia per part der Ajuntament”, pr’amor que considère que “cau esvitar cassi coma eth deth cine, qu’a demorat barrat pendent mès d’un an entà tornar-lo a daurir damb ua lauada superficiau, en tot desestimar eth bastiment de 35 viuendes sociaus”.
En aguest sens, Unitat d’Aran apòste per “accelerar es gestions der Ajuntament entà qu’er Institut Catalan deth Solèr dera Generalitat assomisque era sua responsabilitat entà promòir pisi de proteccion sociau en tot priorizar es de règim de loguèr”.
Dauant dera “inactivitat” deth govèrn municipau de Vielha e Mijaran, Joan Riu a assegurat que “Unitat d’Aran ei ena obligacion d’articular un projècte ambiciós entà que Vielha non pèrde volada e pogue devier un referent enes politiques de proximitat, benèster e progrès sociau e economic en conjunt deth Pirenèu, e qu’aué malurosament ei luenh d’arténher”. E entà d’aquerò, calen “mès trabalh, mès responsabilitat e mès lideratge”.
