(Article publicat en diari Segre, ena seccion De lin e de lan, deth dia 3 de gèr de 2009)
I auec un temps en qué fòrça causes èren per hèr e tot ère lèu possible, coma diderie eth poèta. Er orizon se desdibuishaue a mesura qu’es governants auançauen a còp d’imprevision e, mentre eth doctrinarisme guanhaue terrèn, eth pensament demoraue inèrme, e era accion de govèrn devenguie mès erratica. Totun, i auie tant per hèr… Èren ues autes formes de hèr politica. Encara ara i a fòrça per hèr, mès, ena naua politica, era survelhança des ahèrs comuns respon a un trabalh constant, un compromís explicit e un discerniment collegiat des rèptes e oportunitats dera societat: eth torisme afronte era sua internacionalizacion e desestacionalizacion, era sanitat articule ua melhora dera atencion as usatgèrs, es servicis sociaus compdaràn damb ua residéncia assistida renauida, era politica territoriau dispòse d’un plan de melhora des carretères enquia 2011, era cultura e era lengua seguiràn damb eth saut sense precedents, enes darrèri ans, ena apòsta pera ofèrta culturau de qualitat, era lectura infantil e juvenil, era inversion en patrimòni, eca. Ena naua politica, era imprevision e era arrogància dèishen de mercar eth pas; e era possibilitat de cambiar es causes, atau coma era consciéncia dera complexitat, son eth marc d’accion e trabalh d’un projècte sociaument auançat e damb mès oportunitats de progrès. Non ei estonant, per tant, qu’analisis e actors dera vielha politica, paradigma dera desorientacion, projècten aguesta “desorientacion” coma critica as naui paramètres. Fortunosament, eth prètzhèt entà refortir un nau Aran ei dejà present e futur de toti. Erós 2009!
Amador Marqués, cap de Gabinet e Comunicacion deth Conselh Generau d'Aran e secretari de Comunicacion e Relacions Extèrnes d'Unitat d'Aran - PNA
